Home AKTUALITET Kurti prezanton programin qeverisës: Do të jemi qeveri e kursimit të parasë...

Kurti prezanton programin qeverisës: Do të jemi qeveri e kursimit të parasë publike

Albin Kurti ka paraqitur para deputetëve të Kuvendit të Kosovës, planin qeverisës. Kurti ka thënë se ky është një program që adreson secilën fushë dhe prek secilin qytetar të Kosovës.

“Me këtë program do të jetësojmë premtimet e 6 tetorit, datë kjo që solli ndryshimin politik në vend. Do të jemi qeveri e kursimit të parasë publike, para meje do të jenë 15-të ministra e jo 21 sa ishin, do të kemi 33 zv.ministra e jo mbi 80-të sa ishin më herët”, ka thënë Kurti.

Kurti ka shtuar se do të departizohen dhe depolitizohen agjensionet e ndërmarrjet publike.

“Do të departizojmë shërbimin e jashtëm, do të jemi qeveri e zhvillimit ekonomik dhe punësimit, për të ndalë emigrimin masiv duhet të rrisim vendet e punës. Do të mbështesim zhvillimin e ndërmarrësisë me fokus të veçantë ndihmën e ndërmarrjeve të vogla dhe të mesme. Do të heqim monopolet dhe evazionin fiskal, ka më shumë treg të zi dhe këtë do ta ndryshojmë… Do të shuhet AKP-ja do të jetë agjenci brena qeverisë. Do të jemi qeveri për mbrojtjen e punëtorit. Do ta shtojmë numrin e inspektoreve të punës deri në 400”, tha Kurti.

Kurti shtoi se buxheti i shtetit gjatë qeverisjes së tyre do të arrijë në tre miliardë euro.

“Buxheti tre miliardë euro, do të arrij gjatë mandatit tonë. Do të kemi program nacional i kursimit 4 vjeçar përmes së cilit do të evitohen shpenzimet e luksit publik”, u shpreh Kurti.

Kurti shtoi se do të jenë qeveri e bujqësisë, teknologjisë pasi sipas tij të rinjtë janë e ardhmja e këtij vendi./Apel.al